.svg/a717ffbb-ada6-1c55-87b8-28eeaa96002b_t=1553023369569){kind=small}
Escrutinio
O reconto de votos denomínase escrutinio. Nun proceso electoral o escrutinio realízase en dous momentos diferentes.
O escrutinio provisional é o reconto de votos que se realiza na Mesa unha vez finalizada a votación e cuxo resultado fai público o Presidente ou a Presidenta da Mesa unha vez finalizado o reconto.
O escrutinio definitivo realízase o terceiro día seguinte ao da votación polas Xuntas Electorais e debe concluír non máis tarde do sexto día posterior ao das eleccións.
Unha vez termina a votación, comeza o escrutinio nas Mesas.
Nestas eleccións o escrutinio gardará a orde seguinte:
- 1.º Eleccións ao Parlamento Europeo.
- 2.º Eleccións Municipais.
- 3.º Eleccións a Entidades de Ámbito Territorial Inferior ao Municipio, de ser o caso.
- 4.º Eleccións Autonómicas.
O escrutinio de cada elección realízase da maneira seguinte:
O Presidente ou a Presidenta extrae, un a un, os sobres da urna e le en alta voz a denominación da candidatura. Ensinará cada papeleta, unha vez lida, a vocais, interventores e interventoras e apoderados e apoderadas.
Terminado o reconto, resolveranse por maioría as posibles dúbidas e/ou protestas que houbese. Posteriormente, o Presidente ou a Presidenta anunciará en voz alta o resultado, especificando o número de electores e electoras que figuran no censo, o de certificacións censuais achegadas, o número de votantes, o número de votos nulos, o de votos en branco e o dos votos obtidos por cada candidatura.
A Mesa fai públicos os resultados por medio dunha acta de escrutinio, da que dará unha copia a representantes de cada candidatura, a interventores e interventoras, apoderados e apoderadas e candidatos e candidatas que o soliciten, e ao ou a representante da Administración.
Os resultados coñécense tan rapidamente porque existe un complexo e avanzado procedemento de transmisión da información.
En cada Mesa electoral existe un ou unha representante da Administración que, unha vez concluíu o escrutinio, recibe do Presidente ou Presidenta da Mesa unha copia da acta de escrutinio cos resultados desa Mesa e os transmite ao centro de totalización de datos do Ministerio do Interior.
- Estes resultados que da o día das eleccións o Goberno da Nación obedecen ao cumprimento das previsións contidas no artigo 98.2 da LOREG: “O Goberno deberá dar información provisional sobre os resultados da elección”.
- Nas eleccións ao Parlamento Europeo, os resultados provisionais non poderán ser ofrecidos ata que se pecharon as urnas no Estado membro no que os electores voten en último lugar.
- O escrutinio oficial e definitivo comezará tres días despois da votación e levarase a cabo polas Xuntas Electorais competentes. Para as eleccións ao Parlamento Europeo serán as Xuntas Electorais Provinciais, e para as eleccións locais as Xuntas Electorais de Zona,
- Os resultados oficiais son os que se publican no «Boletín Oficial do Estado».
Antes de proceder ao escrutinio definitivo, a Xunta Electoral competente constitúese en Mesa para proceder ao reconto de votos das persoas residentes ausentes. Ás oito da mañá, cos interventores e interventoras que designen as candidaturas concorrentes, o Presidente ou Presidenta procede a introducir na urna os sobres de votación das persoas residentes ausentes recibidos ata ese mesmo día e o Secretario ou Secretaria anota os nomes dos votantes na lista. Acto seguido a Xunta escruta os votos e incorpora os resultados ao escrutinio definitivo.
O escrutinio xeral ou definitivo (art. 103 e ss. LOREG) realízase o terceiro día seguinte ao da votación pola Xunta Electoral que lle corresponda. É un acto único e ten carácter público.
O Presidente ou Presidenta estende a acta de constitución da Xunta e asínaa xunto cos e coas vocais, o Secretario ou Secretaria e as persoas representantes e apoderadas das candidaturas debidamente acreditadas.
A sesión de escrutinio iníciase lendo o Secretario ou a Secretaria as disposicións legais. A continuación procédese á apertura dos sobres (o sobre número 1 coa documentación electoral correspondente a cada Mesa) que se entregaron o día das eleccións nos Xulgados.
O Secretario ou Secretaria dará conta dos resumos de votación de cada Mesa. Durante o escrutinio a Xunta non pode anular ningunha acta nin voto, limítase a verificar o reconto e a suma dos votos nas correspondentes Mesas segundo as actas ou as copias das actas das Mesas. Si existise erro material, de feito ou aritmético, procederase á súa emenda.
O acto de escrutinio non debe interromperse e deberá concluír non máis tarde do sexto día posterior ao das eleccións.